Cejna Zimanê Kurdî li hemû kedkarên zimên û Kurdan pîroz be

JI ÇAPEMENÎ Û RAYA GIŞTÎ RE

Kolonyalîzm û dagirkeriya li ser Kurdistanê heta niha û berî niha, bi sedan salan e dewam dike. Ev jî dibe sedem ku hebûn, ziman, çand û nasnameya gelê Kurd ji aliyê dagirker û desthilatdaran ve di bin zexta înkar û tinekirinê de be.

Bi dabeşkirina axa Kurdistanê ya ji aliyê çar dewletên dagirker ve û siyasetên înkarê metirsiyên li ser zimanê kurdî berdewam in.

Tevî zext, givaşên dijwar, dûrxistin, qedexekirina xwendin, nivîsandin û bikaranîna zimanê dayikê, kurdan di qonaxên cuda de bi saya wêjeya devkî û nivîskî hebûn û nasnameya xwe parastine, heta roja îro domandine.

Di vê navberê de lazim e rola Celadet Elî Bedirxan û derxistina Kovara Hawarê ku di wê serdemê de û ji bo nifşên niha jî bûye xwendingeh, neyê jibîrkirin.

Li hember siyaset û sîstemên înkarker, xwedîderketina li çand û ziman, bikaranîna ziman a di jiyana rojane de her wiha li gel pêşxistinê hewldana ji bo zimanê kurdî bibe zimanê fermî û perwerdeyê têkoşîn, berxwedana di vê rêyê de gelekî girîng e. Ev berpirsyaretiyeke exlaqî û dîrokî ye.

Em wek Navenda PENa Kurd di Cejna Kurdî de pirtûka Rabûna Berî li Gulberojan a ku bi çîrok û helbestên nivîskarên di zindanan de hatiye amadekirin li hemû xwendekarên Kurdî dikin diyarî û hewl didin ku rê li ber azadiya ramanê û nivîsînê vebikin, dengê wan bigihînin cîhanê.

Bi hêviya ku dengê Kurdî li çar aliyên Kurdistanê û cîhanê her roj hinekî din xurtir û berztir bibe, 15’ê Gulanê, Cejna Zimanê Kurdî li hemû kedkarên zimên û Kurdan pîroz be…

Komîteya Rêveberiya Giştî ya PENa Kurd

15.05.2023