Bila hemû rojnamegerên girtî bên berdan
JI ÇAPEMENÎ Û RAYA GIŞTÎ RE
Dadgehên Herêma Kurdistanê derveyî zagonan derbarê rojnamevanan de tevdigerin
Li gor raporta rêxistinên navdewletî yên parastina mafê mirovan û azadiya derbirînê, di 5 salên borî de li Herêma Kurdistanê sînorên azadiya derbirînê hatiye berteskkirin û rojnamevan têne zîndanîkirin.
Li gorî zagona Rojnamegeriyê ya hejmara 35an a sala 2007an a Parlamentoya Herêma Kurdistanê, çênabe ti rojnamevanek bi sedema pîşeya xwe bê girtin! Lê tevî vê dadgeh bi xwe zagonan binpê dikin, rojnamevanan desteser dikin û cezayê girtîgehê jî didin wan.
Ji sala 2020î ve girtin û cezakirina rojnamevanan li Badînanê dest pê kiriye, tevî ku ti îdîa û tewanên di derbarê wan de nehatine selimandin jî, lê dadgehên Herêma Kurdistanê biryarên nehiqûqî li ser wan dane û ew ceza kirine. Parêzer û pisporên zagonî di vê baweriyê de ne ku dadgehên Herêma Kurdistanê “di bin givaşa partiyan de” biryaran didin.
Şêrwan Şêrwanî yek ji wan rojnamevanan e ku di 16ê Sibata 2021ê de ji aliyê dadgeha Hewlêrê ve cezayê 6 salên girtîgehê lê hatibû birîn, piştre cezayê wî bi biryarnameya Serokatiya Herêma Kurdistanê ji %50 hat kêmkirin û diviyabû di 9ê Îlona 2023yan de bihata azadkirin, lê di 20ê Tîrmehê de dadgehê bi biryareke ecêb, cardin cezayê 4 salên girtîgehê li cezayê wî zêde kir.
Şaxa Kurdistanê ya Saziya (CPT) ya Emerîkî ku di proseya dadgehkirinê de amade bû ragihandiye: ”Di dema birêveçûna dadgehê de salona dadgehê hatibû milîtarîzekirin û di proseyeke neadilane de cezayekî neadilane bi ser Şêrwan Şêrwanî de hate sepandin.”
Li gor çavdêriyên rêxistinê “sîstema dadweriyê li Herêma Kurdistanê serbixwe nîne û partiyên desthilatdar destwerdanê di proseya dadgehkirina rojnamevanan de dikin.”
Herwiha bi sedema rexnegirtina ji biryara carsin cezakirina Şêrwan Şêrwanî, şeva 20ê Tîrmehê rojnamevan Omêd Berojkî ji aliyê hêzên ewlekariyê ve hate girtin û êvariya roja paştir hate berdan.
Omêd Berojkî yek ji girtiyên Behdînan bû ku ji ber karê rojnamegariyê ji 21ê Tebaxa 2020ê heta 22ê Sibata 2022ê di zindanê de bû.
Navenda PENa Kurd dilgiraniya xwe li hember sînordarkirina azadiya raderbirînê û binpêkirina zagonan a li dijî rojnamevanên li Herêma Kurdistanê nîşan dide û daxwaz dike ku rojnamegerên mîna Şêrwan Şêrwanî, Omîd Baroşkî bi awayekî serbest bikaribin karê xwe bikin û hemû rojnamevanên girtî demildest bêne berdan û li gor zagona ber kar a hejmara 35an taybet bi karê rojnamevaniyê bi rojnamevanan re tevbigere.
Komîteya Rêveberiya Giştî
Navenda PENa Kurd
24.07.2023
