Archive for category: Nuçeyên Navendê

NAVENDA NÛÇEYAN – Mamosteya zimanê Kurdî û Seroka Komaleya Çand-Civakî ya Nozînê Zara Muhamedî ya 5 meh in li Girtîgeha Sanandajê girtiye ji ber bavê wê nexweş e ew şandin destûrê.

Mamosteya zimanê Kurdî û Seroka Komaleya Çand-Civakî ya Nozînê Zara Muhamedî ya 6 meh in li Girtîgeha Sanandajê girtiye ji ber bavê wê nexweş e ew şandin destûrê. Hêzên ewlehiya Îranê piştî xirabbûna rewşa tendûristiya bavê Zara Muhammedi, deh roj destûr danê. Mamosteya zimanê Kurdî Zara Muhamedî 5 meh in ku li Girtîgeha Sanandajê tê girtin.

Zara Muhammedi di 23’yê Hezîrana 2009’an de hat girtin û di 3’yê Kanûna heman salê de bi kefaleta 700 milyon tomarê hate berdan.

Di Tirmeha 2020’î de Dadgeha Şoreşê ya li Sanandajê bi hinceta “bi armanca zirardayîna ewlehiya neteweyî avakirina komekê” deh sal cezayê girtîgehê lê birî, lê Dadgeha Temyizê ya Çaremîn di Sibata 2021’ê de cezayê daxist 5 salan.

Endama damezrîner û dîrektora Komaleya Çandî û Civakî ya Nozînê Zara Muhamedî, di 8’ê Çileyê de şandin Girtîgeha Sanandajê.

Di dema binçavkirina kêyfî de ji bo dermankirina nexweşiyên wê yê made û ziravê mafê wê yê dermankirinê hat astengkirin û hat zanîn ku di dema binçavkirinê de hêzên ewlehiyê bi girtina endamên malbatê gef li Zara Muhamedî xwarine û ji bo li ser televîzyonê li xwe mikur bê gelek zext û êriş li ser çalakvana mafên mirovan Zara Muhamedî kirine.

NAVENDA NÛÇEYAN – Li gor rapora Şaxa ÎHD’ê ya Mêrsînê li girtîgehên Tarsûs, Aksaray û Eregliyê pirtûkên girtiyan tevî ku wezaretê erê kiriye jî nayê dayin.

Şaxa Komeleya Mafê Mirovan (ÎHD) a Mersînê rapora binpêkirina mafan a li girtîgehên bi tîpên T ên Tarsûs, Aksaray û Eregliyê amade kir. Li gor rapora ji aliyê Berdevkê Komîsyona Girtîgehan a Şaxa ÎHD’ê ya Mêrsînê Battal Încî ve hat eşkerekirin tedawiya girtiyan nayê kirin û pirtûkên ku wezaretê erê kiriye jî nadin girtiyan. Her wiha Battal xwest ku ev pirsgirêk bên çareserkirin.

NAVENDA NÛÇEYAN – Nûçegihana Al-Jazeera Şirîn Ebû Akîle, ji aliyê leşkerên Îsraîlê ve bi gulebarandinê hat kuştin.

Nûçegihana televizyona Al-Jazeera Şîrîn Ebû Akîle, di Wargeha Penaberan a Cenîn a Bati Şerîayê de di encama gule berdana leşkerên Îsraîlê de jiyana xwe ji dest da. Wezareta Tenduristiyê ya Filistînê di daxuyaniya xwe de ragihand ku Şîrîn di encama guleberdanê de giran birîndar bû û pişt re jiyana xwe ji dest da.

Şirîn, serdegirtina arteşa Îsraîlê ya Wargeha Cenînê dişopand.

NAVENDA NÛÇEYAN – Bi pêşengiya PENa Kurd, Komeleya Wêjekarên Kurd û Komeleya Nivîskarên Mezopotamyayê dê ji bo xwedîderketina li berhemên nivîskarên di zindanan de li Rihayê berhemên nivîskarên di zindanan de bên îmzekirin.

Di çarçoveya bernameya îmzekirina berhemên nivîskarên di zindanan de dê bi pêşengiya PENa Kurd, Komeleya Wêjekarên Kurd û Komeleya Nivîskarên Mezopotamyayê berhemên nivîskarên di zindanan de bên îmzekirin. Wê di 14’ê Gulanê de li Eywana Perwerdehî ya Muhsin Melik a Serokatiya Odeya Endezyarên Çandiniyê ya Rihayê saet di navbera 11.00-17.00’an de bernameya îmzekirina berhemên nivîskarên di zindanan de bê lidarxistin.

Vê carê wê berhemên 10 nivîskaran bên îmzekirin

Bernameya îmzekirina berhemên nivîskarên di zindanan de li Amed, Mêrdîn û Êlihê jî hatibû lidarxistin. Wê vê carê li Rihayê bê lidarxistin û berhemên 10 nivîskarên di zindanan de bên îmzekirin. Wê vê carê berhemên nivîskar Nurullah Tutal, Mehmet Durak Karak, Murat Turk, Mehmet Oztaş, Sînan Sutpak, Mahmut Yamalak, Ferhan Mordenîz, Mehmet Yavuz, Abdurrakîp Yuksekbag û Mahmut Aslan bên îmzekirin.

Li Osman Kavala cezayê hepsê ya heta hetayê hate birîn, 7 kes jî hatin girtin.

Di Doza Geziyê de ku 22yê Nîsanê roja înê destpê kir, 25ê Nîsanê roja duşemê biencam bû. Lijneya Dadgehê cezayê hepsê ya heta hetayê ango cezayê muebbedê da Osman Kavala ku 4 sal û nîv in girtî ye. 7 kesên ku ceza li wan hatin birîn ku di dema danişînê de li salonê bûn hatin girtin û şandin girtîgehê.

Dadgeha navborî li Dadgeha Cezayê Giran a 13emîn a Stenbolê pêk hat. Dadgehê, cezayê herî giran li Osman Kavala birî û bi zîndankirina heta hetayê ceza kir. Dadgeha Cezayê Giran herwiha biryara girtina 7 kesên bi navê Mucella Yapici, Çîgdem Mater, Hakan Altinay, Mîne Ozerden, Can Atalay, Tayfûn Kahraman û Yîgît Alî Ekmekçî da û her yekî ji wan 18 sal ceza li wan birî. Dema ku heyeta dadgehê xwest ku Mucella Yapici û Can Atalay li salona dadgehê bêne binçavkirin û girtin, Atalay bertek nîşan da û got: “Em dixwazin xatirê xwe ji malbat û hevalên xwe bixwazin.”

Biryara dadgehê di salonê de bû sedema nerazîbûneke mezin. Ji ber vê yekê heyet ango lijneya dadgehê neçar ma ku di ragihandina biryarê de du caran bisekine.

Osman Kavalayê ku bi riya tora ragihandinê beşdarî dadgehê bibû, gava lijneya dadgehê biryara xwe eşkere dikir, milên xwe gihandibûn hev, pişta xwe dabû dîwêr û dikeniya.

Roja yekem a danişînê, beriya ku dadgeh destpê bike, Navenda PENa Kurd li hewşa mezin a Dadgeha Çaglayana Stenbolê pêşwazî li Serokê Giştî Yê PENa Navneteweyî Bûrhan Sonmez, Rayedarên Komîteya PENa Navneteweyî, Sekreter û rayedarên PENa Norwecê kir û beşdarî li dadgehê kir. Di hevdîtina li dadgehê de Seroka PENa Tirk Zeynep Oral û rayedarên wê jî hebûn. Helbet gelek parlamenterên ji HDP, CHP û TÎPê, gelek rêveberên ji sendîka û saziyên demokratîk û nivîskar, şaîr û rojnameger jî li dadgehê ji bo piştgiriyê amade bûn.

Serokê PENa Navneteweyî Bûrhan Sonmez, ji Rêveberiya PENa Navneteweyî Eugine Schoulgin, Sekretera Giştî ya PENa Norwecê Hege Newth, Cîgira Sekretera PENa Norwecê Agnete Haaland, Sekreterê Giştî yê Berê yê PENa Norwecê William Nygaard ku niha di nav rêveberiya PENa Navneteweyî de kar dike, Ji Rêveberiya PENa Norwecê û Berpirsa Ofîsa Tirkiyê Carolîne Stockford, Şaîr û Endama PENa Norwecê Karîn Henderson û ji Rêveberiya PENa Tirkiyê Halîl Îbrahîm Ozcan û ji Navenda PENa Kurd Salih Kevirbirî beşdarî li vê danişîna dadgehê kir.

PENa Kurd, heman roj û roja din çar caran li deverên curbicur ên Stenbolê bi Serokê Giştî yê PENa Navneteweyî Bûrhan Sonmez, rayedarên PENa Navneteweyî, PENa Norwecê û sazî û dezgehên demokratîk re hevdîtinên sûdewar û bikêrhatî kir.

Navenda PENa Kurd

NAVENDA NÛÇEYAN – Ji ber parvekirinên li ser medyaya dîjîtal salek û 6 meh ceza li nivîskar Yavuz Ekîncî hat birîn.

Bi hinceta 8 sal berê têkildarî Kobanê li ser medyaya dîjîtal peyam parve kirine, derheqê nivîskar Yavuz Ekîncî de bi îdiaya “Propagandaya rêxistinê” doz hatibû vekirin. Rûniştina biryarê ya dozê îro li 34’emîn Dadgeha Cezayên Giran a Çaglayan a Stenbolê hat dîtin. Di rûniştinê de nivîskar Yavuz, parêzerê wî Can Ekîncî û Serokê Baroya Êlihê Erkan Şenses amade bûn.

Di rûniştinê de dozger, daxwaza xwe ya berê dubare kir û anî ziman Yavuz were cezakirin. Yavuz jî di parastina xwe de got ku her nivîskar divê xwedî fikr û wijdan be û wî jî li dijî neheqiyê dengê xwe derxistiye. Yavuz, da zanîn ku mafê wî yê azadiya fikr û raman tê darizandin û beraeta xwe xwest. Piştre jî parêzerê Yavuz parastina miwekîlê xwe kir û beraet xwest.

Piştî parastinan, dadgehê ji bo biryarê navber da. Dadgehê, bi îdiaya “Propagandaya rêxistinê”, salek û 6 meh û 22 roj ceza da Yavuz. Dadgehê ev ceza jî taloq kir.

NAVENDA NÛÇEYAN – Cezayê girtîgehê yê 6 sal û 3 mehan li endamê PENA a Kurd, Nivîskar û weşanger Azad Zal hat birîn.

Rûniştina doza ku di çarçoveya lêpirsîna Kongreya Civaka Demokratîk (KCD) de li nivîskar û weşanger Azad Zal (Mehmet Gungormuş) hatibû vekirin, li 8’emîn Dadgeha Cezaya Giran a Amedê hat dîtin. Azad tevlî rûniştinê nebû, lê parêzerê wî Abdullah Çager lê amade bû. Dozger, mutalaaya xwe ya rûniştinê beriya niha dubare kir û bi sûcdariya “endamtiya rêxistinê” xwest ceza li Azad Zal bê birîn.

Parêzer Abdullah Çager li dijî mutalaayê parastin kir û sûcdariyên li muwekîlê xwe qebûl nekir û daxwaz kir ku Azad bê beraetkirin.

Heyeta dadgehê, piştî parastinê biryar da ku 6 sal û 3 meh cezayê girtîgehê li Azad bê birîn û ji hin mafan bêpar bê hiştin.

NAVENDA NÛÇEYAN – Bi hinceta ku endamê PENa Navneteweyî Gokhan Yavuzel derbarê Deniz Poyraz de parvekirin kiriye lê doz hat vekirin.

Lêpirsîna ku ji ber parvekirina wî ya têkildarî Denîz Poyraz a li avahiya HDP’ê ya Bajar a Îzmîrê hatibû kuştin li Endamê PEN’ê Gokhan Yavûzel hatibû destpêkirin, temam bû. Serdozgeriya Komarê ya Rihayê, ji ber parvekirina wî ya “Tetikkêşê Poyraz Dewlet Bahçelî û pêdankirin jî Erdogan e. Erdogan dewleta çete veguherand dewleta mafyayê.” bi angaşta”heqareta li serokkomar” derbarê Gokhan de doz vekir. Doznameya ku hat amadekirin ji aliyê 4’emîn Dadgeha Cezayê Esliyeyê ya Rihayê ve hat qebûlkirin.

Wê danişîna yekemîn a dozê di 10’ê gulanê de li 4’emîn Dadgeha Cezaya Esliyeyê ya Rihayê bê dîtin.

NAVENDA NÛÇEYAN – Ji bo 11 salên bingehîn ên destpêka hîndekariya kurdî bi rêkûpêk werin meşandin 21 pirtûkên dersdanê bi xebata Komeleya Hîndekariya Kurdî di nav weşanên Instîtuta Kurdî ya li Swîsreyê de hatin çapkirin.

Bi piştgirî û hevkariya Xwendegeha Bilind a Pedagojî ya Zurichê, Wezareta Çandê ya Swîsre BAKê û bi xebata 5 salan a Komeleya Hîndekariya Kurdî ya li Swîsreyê bi piştgiriya PENa KURD û Yekîtiya Mamosteyên Kurd a li Ewropayê ji bo hîndekariya Kurdî 21 pirtûkên dersdanê di nav weşanên Instîtuta Kurdî ya li Swîsreyê de derketin.

Ev pirtûk wiha ne:

Ji bo asta berî xwendegehê 2 pirtûk

Ji bo hînbûna Kurdî wek zimanê duyem pirtûkek

Ji bo sê salên asta jêrîn 6 pirtûk, her saleke hîndekariyê du pirtûk, pola 1,2,3

Ji bo sê salên asta navîn 6 pirtûk, her saleke hîndekariyê du pirtûk, pola 4,5,6

Ji bo sê salên asta jorîn 6 pirtûk, her saleke hîndekariyê du pirtûk, pola 7,8,9

Deftera ji bo mamosteyan

Bi tevahî 21 pirtûkên li pey hev rêz dibin ji asta temenê zarokê 5 salî heta bigihe 15 saliya xwe, dikare li ser van pirtûkan hînî ziman, çand, kevneşopî, dîrok, erdnîgarî, huner, jiyana civakî û gelek zanînên girîng ên welatê lê dijî û welatê jê hatiye, yan welatê dê û bavê zarok jê hatiye -ku ev ji bo piraniya zarokên Kurdan Kurdistan û zimanê Kurdî-Kurmancî ye- bibe.

Di nivîsîna van pirtûkan de ji kesên pispor ên wek şarezayê ziman, dîdaktîk, metodîk û pedagogik komisyon hatine sazkirin û pirtûk bi erêkirina van komiyonan gihiştine asta çapê. Her wiha pirtûk ji aliyê olî û siyasî ve bêalî hatine amadekirin.

Di naveroka pirtûkan de sazûmana perwerdeyiyê ya zimanê dayikê û çanda welêt a li Swîsre û li Almanya wek bingeh hatiye girtin.

Di her pirtûkekê de bi kêmayî 22 mijarên têrî du seetên perwerdeyê bikin, hene. Saleke xwendegehê wek 44 hefteyan hatiye hesibandin. Ji bo her saleke perwerdeyê du pirtûkên bi kêmanî ji 22 mijaran pêk tên, hatin çêkirin. Zagonên hîndekariya zimanê dayikê û çanda welêt li derveyî welêt destûrê dide, ku di hefteyekê de du seetan perwerde were meşandin. Bi vê armancê pirtûk li gor vê zagonê hatine amadekirin.

Hûn dikarin hemû agahiyên li ser pirtûkan, naveroka pirtûkan, riya bidestxistina pirtûkan û lênêrîna mijarên di pirtûkan de hene, li ser malpera Komeleya Hîndekariya Kurdî ya li Swîsreyê www.zimanekurdi.ch û li ser malpera Instîtuta Kurdî ya Swîsreyê www.institutkurdi.ch bibînin, bixwînin û bikirin.

Li diyasporayê cara yekem e ji bo zarokên Kurdan û giştiya Kurdan xizmeteke wiha bi rêk û pêk û bi nirx, di encama xebateke bi roj û şevan, meh û salan de tê kirin. Ev xebata 21 pirtûkên hîndekariya Kurdî li zarokên Kurd û li gelê me pîroz be.

Instîtuta Kurdî ya li Swîsreyê

NAVENDA NÛÇEYAN – Hevseroka PENa Kurd Eslîxan Yildirim, ji bo zarokên ku wê dersa bijarte ya Kurdî hilbijêrin pirtûkên Kurdî şandin.  

Hevseroka PENa Kurd û di heman demê de xwediya Weşanxaneya Azad Eslîxan Yildirim ji bo zarokên ku wê dersa bijarte ya Kurdî hilbijêrin û ji bo mamosteyan pirtûkên bi navê Fêrbûna Kurdî, Herdemciwanê û Hezar û Yek Şev yên bi zimanê Kurdî şandin Amedê, Batmanê û Mêrdînê. Têkilî berdewam in, ji bo mînakgirtinê wê belavkirina van pirtûkan ji bo hin bajarên din jî dom bike.  

Fêrbûna Kurdî-Pêngava Yekem ji aliyê nivîskarê 21 pirtûkên hîndekariyê Hesen Huseyin Deniz ve hatiye nivîsandin û amadekirin. Ev kitêb ji bo perwerdeya kesên ku nû dest bi xwendina Kurdî-Kurmancî dikin. Herdu kitêbê din, Herdemciwanê (Eslîxan Yildirim) û Hezar û Yek Şev(Wergera ji Erebî-Menaf Osman) çîrokên gelerî ne, mamoste wek materyalên alîkar dikarin wan bikar bînin. Wê ev pirtûk li hinek sazî û zarokan bên belavkirin.  Ji ber ku têra herkesi kitêb nikare bê şandin, di heman demê de Weşanxaneya Azad di malpera xwe de di gel hin pirtûkên din ev pirtûk jî wek PDF bela kirine (https://wesanxaneyaazad.net/index.php/pirtuken-pdf/ ). Çi kesê bixwaze dikare wan bê heq ji xwe re daxe, ji bo perwerdehiyê sûdê werbigire û xwendina xwe bi pêş bixîne.